Publicado por: F.G. Atletismo
A Sociedad Gimnástica de Pontevedra xa ten en marcha a conta atrás para unha das datas máis importantes da súa historia. A entidade, unha das sociedades deportivas máis antigas e representativas do atletismo galego, celebrará en 2027 o seu centenario cun amplo programa de actividades que pretende render homenaxe ao seu pasado, recoñecer o traballo das persoas que contribuíron ao seu crecemento e proxectar o club cara ao futuro.
A programación foi presentada este martes nun acto celebrado na Casa das Campás, no que a entidade desvelou unha proposta que aspira a estar «á altura do que representamos». A presentación contou coa participación de atletas históricos, expresidentes e representantes institucionais, entre eles o alcalde de Pontevedra, Miguel Anxo Fernández Lores; o secretario xeral para o Deporte, Roberto García, e o vicepresidente provincial, Rafa Domínguez e o presidente.
A presidenta da Gimnástica, Charo Castro, foi a encargada de reivindicar o papel pioneiro que desempeñou o club ao longo da súa traxectoria. Entre os fitos que destacou figuran a promoción da participación das mulleres no deporte e a organización de probas populares que hoxe forman parte do calendario deportivo da cidade e de Galicia. É o caso do primeiro medio maratón galego ou da San Silvestre, impulsada pola entidade con motivo das súas vodas de ouro.
Un centenario en tres dimensións
A programación estrutúrase arredor de tres grandes eixes: o simbólico, o social e o deportivo. Tres ámbitos que permitirán combinar a lembranza da historia da entidade co recoñecemento aos seus protagonistas e a organización de novas citas atléticas.
No apartado simbólico destaca a creación do cartel conmemorativo do centenario, obra do artista Antón Sobral, así como a emisión dun selo especial por parte de Correos. A Deputación de Pontevedra tamén colaborará na publicación dun libro sobre a historia da Sociedade Gimnástica, escrito polo xornalista Xaime Nogueira Casás.
Ademais, no día central da celebración descubrirase unha placa conmemorativa nas proximidades do lugar onde naceu o club, nas Galerías da Oliva, un xesto que servirá para vincular a efeméride coas orixes da entidade.
O bloque social estará dedicado especialmente ás persoas que construíron a historia da Gimnástica. Entre as actividades previstas figura unha gala de homenaxe aos atletas internacionais e aos adestradores máis destacados do club, así como un recoñecemento aos socios máis antigos.
As exposicións tamén terán un papel protagonista. En marzo inaugurarase unha mostra na Praza de Ourense dedicada ás lendas da Gimnástica, mentres que en setembro abrirá outra exposición máis ampla que percorrerá a historia da entidade a través de fotografías, obxectos e lembranzas. O programa completarase cunha cea-gala de aniversario.
Un meeting internacional como gran escaparate deportivo
No apartado deportivo, unha das citas máis destacadas será o Meeting Internacional do Centenario, previsto para o 7 de xullo nas instalacións do Centro Galego de Tecnificación Deportiva (CGTD). A organización agarda reunir atletas de España e doutros países europeos nun momento importante da tempada atlética.
A intención do club é que esta competición non sexa unha cita puntual, senón que poida consolidarse co paso dos anos no calendario deportivo de Pontevedra.
A programación incluirá tamén un festival de atletismo para as categorías de base e a organización do Campionato de España Short Track por Clubes, previsto para o 30 de xaneiro en Ourense, coa Gimnástica como entidade anfitrioa.
Xunto a estas grandes citas, manteranse as probas que xa forman parte da identidade deportiva do club, como o Medio Maratón de Pontevedra e a San Silvestre. Tamén regresará Saltando na Rúa, que pasará a denominarse Atletismo na Rúa e levará esta disciplina aos espazos públicos da cidade.
Calendario de actividades do centenario.
A programación estenderase ao longo de todo o ano, con actividades que comezarán xa en decembro de 2026 e rematarán coa San Silvestre de 2027.
- 10 de decembro de 2026: presentación do cartel do centenario.
- 30 de decembro de 2026: izado da bandeira do centenario na entrada do CGTD.
- Xaneiro de 2027: gala Un club de lenda, en homenaxe aos atletas internacionais e aos adestradores históricos.
- 30 de xaneiro de 2027: Campionato de España Short Track por Clubes, en Ourense.
- Marzo de 2027: exposición sobre as lendas da Gimnástica na Praza de Ourense.
- Abril de 2027: homenaxe aos socios máis antigos.
- Maio de 2027: Trofeo Centenario de atletismo de base no CGTD.
- 7 de xullo de 2027: Meeting Internacional do Centenario no CGTD.
- 28 de agosto: celebración de Atletismo na Rúa na Praza da Ferrería.
- 1 de setembro de 2027: inauguración da exposición do centenario.
- 2 de setembro de 2027: celebración do centenario da Sociedad Gimnástica.
- Setembro de 2027: cea-gala do centenario.
- 17 de outubro de 2027: Gran Fondo Medio Maratón de Pontevedra.
- Novembro de 2027: presentación do libro do centenario.
- 31 de decembro de 2027: clausura dos actos coa San Silvestre de Pontevedra.
Cen anos despois da súa fundación, a Sociedad Gimnástica quere converter esta celebración nunha homenaxe colectiva a todas as xeracións que fixeron posible a súa historia. Un século de atletismo, competición, promoción deportiva e compromiso coa cidade que o club pretende celebrar mirando tamén cara aos próximos cen anos.
O artigo A Gimnástica presenta as actividades do seu centenario. publicouse primeiro en Federación Galega de Atletismo.
Enlace con la noticia original: A Gimnástica presenta as actividades do seu centenario.