Comunicado da RFEC e das súas federacións autonómicas en relación ás condicións nas que debe desenvolverse a actividade deportiva profesional e federada a partir do luns 4 de maio

 A Orde  SND/388/2020, do 3 de maio, regula que os deportistas profesionais, de acordo co estipulado no Real Decreto 1006/1985, do 26 de xuño, polo que se regula a relación laboral especial dos deportistas profesionais, e os deportistas cualificados polo Consello Superior de Deportes como deportistas de alto nivel ou de interese nacional, poderán realizar adestramentos de forma individual, ao aire libre, dentro dos límites da provincia na que resida o deportista.

Os/ as ciclistas que se atopen nesta catalogación poderán realizar a partir de mañá, día 4 de maio, os seus adestramentos con estas condicións:

a) Poderán acceder libremente aos espazos naturais que requiran para desenvolver a súa actividade deportiva.

b) A duración e o horario dos adestramentos serán os necesarios para o mantemento adecuado da forma deportiva.

c) A distancia de seguridade interpersoal será de dez metros cando se realicen os adestramentos.

d) Poderá presenciar os adestramentos unha persoa que exerza o labor de adestrador, sempre que resulte necesario e que manteña as pertinentes medidas de distanciamento social e hixiene.

e) A acreditación suficiente que contempla a norma é a licenza deportiva. É recomendable que os deportistas cualificados polo Consello Superior de Deportes como deportistas de alto nivel ou de interese nacional porten o certificado emitido polo CSD e os deportistas profesionais conten cunha declaración responsable da súa empresa ou equipo que acredite que cumpren o Real Decreto 1006/1985, do 26 de xuño.

f) Os deportistas da modalidade de ciclismo adaptado pertencentes a este grupo poderán contar co acompañamento doutro deportista para realizar a súa actividade deportiva, se isto resulta ineludible. Neste caso, as distancias de seguridade interpersoal reduciranse o necesario para a práctica deportiva, debendo utilizar ambos os máscara, e aplicaranse as medidas que se consideren oportunas para garantir a hixiene persoal.

Aqueles ciclistas federados que non se atopen no grupo de deportistas profesionais, ou os recoñecidos polo CSD como de alto nivel ou de interese nacional, poderán realizar adestramentos baixo as seguintes condicións:

a) Poderán realizar adestramentos de forma individual, en espazos ao aire libre, dúas veces ao día, entre as 6:00 horas e as 10:00 horas e entre as 20:00 horas e as 23:00 horas, e dentro dos límites do termo municipal no que teñan a súa residencia.

b) Poderán acceder libremente aos espazos naturais que requiran para desenvolver a súa actividade deportiva.

c) Deberán respectar a distancia de seguridade interpersoal de 10 metros.

d) Non se permite a presenza de adestradores ou outro tipo de persoal auxiliar durante o adestramento.

e) A licenza deportiva será suficiente para acreditar ser un deportista federado.

f) Cando se trate de deportistas federados que practiquen a modalidade de ciclismo adaptado poderán contar co acompañamento doutro deportista para realizar a súa actividade deportiva, se isto resulta ineludible. Neste caso, as distancias de seguridade interpersoal reduciranse o necesario para a práctica deportiva, debendo utilizar ambos os máscara, e aplicaranse as medidas que se consideren oportunas para garantir a hixiene persoal.

A Orde publicada regula os deportistas federados e non concreta a situación dos menores de 14 anos, nin os maiores de 70 anos, polo que realizaremos as consultas pertinentes para aclarar se estes poden adestrar nas condicións desta orde publicada o día 3 de maio.

Agradecemos a colaboración e o civismo que mostrou o colectivo ciclista durante esta fin de semana e instamos a continuar respectando a normativa e a colaborar coas autoridades.

Seguiremos esperando a que o resto de propostas expostas ás autoridades no noso comunicado anterior poidan ser atendidas en canto sexa posible pola evolución da pandemia.