O conxunto sénior feminino protagonizou a fazaña da fin de semana. Tras ceder os dous primeiros sets nun duelo vibrante e moi axustado ante a filial viguesa, o equipo non baixou os brazos. Co apoio da bancada e un notable axuste defensivo e no saque, as nosas igualaron o choque vencendo o terceiro e cuarto set con autoridade. Na morte súbita do tie-break, a serenidade e a contundencia nos puntos decisivos selaron o 15-11 definitivo. Con este triunfo épico, o Dompavolei SF1 mantense invicto con tres vitorias en tres xornadas e aséntase no liderado da clasificación.

Dobre partido con premio para o Cadete 1. Logo de disputar o seu primeiro encontro a primeira hora da mañá, as xogadoras de Martín Crespo afrontaron o seu segundo compromiso cun desgaste físico notable. Tras colocarse 1-2 abaixo, o grupo amosou unha madurez e un carácter exemplares: arrasaron no cuarto set (25-12) e mantiveron a concentración absoluta no desempate para pechar o partido cun rotundo 15-7, sumando unha vitoria de tremendo valor moral e competitivo.

Gran nivel e entrega do primeiro equipo masculino ante un dos históricos do voleibol galego. O Dompa entrou moi concentrado e levou o primeiro set nun final de infarto (27-25). O cadro olívico reaccionou grazas á súa maior envergadura e contundencia na rede para levarse os tres parciais seguintes, pero as sensacións de xogo e crecemento do cadro ourensán foron moi positivas.

Histórico debut como local do sénior masculino de Valdeorras no Pavillón Vello do Barco. Fronte a un experimentado CV Megatoxos, o noso equipo foi de menos a máis, competindo de ti a ti nun terceiro set pelexado ata o límite (23-25) que demostra a clara progresión do proxecto comarcal.

Tras un arranque dubitativo no primeiro set, as xuvenís demostraron unha gran capacidade de reacción, pelexando cada balón e rozando o set nos dous parciais seguintes, decididos nos puntos extra.

Moi meritoria reacción das infantís, que tras dous sets complicados levantáronse con orgullo para levar o terceiro set (25-20) e manter opcións vivas ata o tramo final do cuarto.

Moi bo primeiro set do conxunto cadete ante a sólida estrutura do conxunto lucense, que posteriormente fixo valer o seu ritmo e continuidade no xogo.