Publicado por: Lucus Atletismo
Grandes RESULTADOS os desta fin de semana na provincia ourensá, colleitados nos CAMPIONATOS DE GALICIA DE PISTA CUBERTA nas distintas categorías e xornadas que tiveron lugar. Nesta ocasión, a representación do Lucus Caixa Rural Galega conseguiu mellorar marcas persoais e volver a casa con varias medallas, segue lendo para coñecer máis!
SÁBADO 24 FEBREIRO
(categorías sub18 e sub20)
A xornada comezaba o sábado para as categorías sub18 (xuvenil) e sub20 (xunior). Nas primeiras horas da mañá, empezaban as probas de velocidade, xunto coa pértega feminina. Encabezando ás nosas atletas, Adiaratou Camara conseguiría rematar na primeira posición a súa serie nas semifinais dos 60m.l., cun tempo de 8.07, logrando un posto na final, na que remataría 3ª, pese a non poder optar a medalla pola súa condición provisional de estranxeira. Na proba de pértega, serían as homónimas Raquel Peña Romero e Raquel López Amado as que amosarían o seu potencial logrando o 1º posto por categoría, a primeira delas en sub20 cun salto de 3.00 metros e a segunda no sub18 feminino saltando os 2.45m, conseguindo as merecidas medallas de ouro. Raquel López repetiría na proba de lonxitude, na que cun mellor salto de 4.46m obtivo o 5º posto na categoría sub18; a mesma categoría na que a atleta Lucía López López quedaría nunha 5ª posición na final dos 800m.l., parando o crono nos 2:20.83.
No tocante ás probas masculinas, Andrés Dono Arias e Santiago Rozas Trastoy, nas semifinais da proba dos 60m.l., farían 7.66 e 7.41 respectivamente de marca, pasando este último á final e conseguindo o 4º posto, cun tempo de 7.31. Andrés, que repetiría horas máis tarde na semifinal dos 200m.l., conseguiría parar o crono nos 24.28, malia non obter un posto na final da proba, quedando entre as 7 mellores marcas rexistradas. Xavier Esteban Domínguez, na proba de altura, lograría alzarse co 2º posto superando o listón nos 1.80m, levando consigo a medalla de prata.
Xa pola tarde, serían os nosos e nosas lanzadoras do club as que daban comezo á proba de peso. Nos homes, Pablo Sánchez Pérez faría 9.04m. de marca, a mellor desta tempada e preto da súa mellor marca persoal, facéndose co 4º posto da proba, ao que seguiría Oliver Vázquez López, na 5ª posición, cun lanzamento de 8.44 metros, tamén moi próximo á súa MMP. Na categoría feminina, o podio viría da man de Antía Novo Sande, nova subcampiona galega cun mellor lanzamento de 5.72 metros, acadando a medalla de prata nesta proba. Xavier Esteban repetiría nas probas de salto, esta vez na pértega, proba que finalizou como subcampión da súa categoría e unha marca de 3.10, obtendo a súa segunda medalla de prata da xornada. Na proba dos 60 metros valados, Santiago Rozas proclamaríase campión galego co 1º posto na final, facendo unha marca de 8.43 e conseguindo a medalla de ouro.
 |
DOMINGO 25 FEBREIRO
(categorías sub10, sub12 e sub14)
No tocante ao domingo, foron as categorías menores da Escola de atletismo as que representaron ao Lucus Caixa Rural Galega neste Campionato Galego de Pista Cuberta, tamén en xornada de mañá e de tarde.
A categoría sub10 estivo representada polas nosas benxamíns de segundo ano Marta Díaz e Adriana López nas probas de altura e peso respectivamente. Malia ser a súa primeira vez nun campionato a nivel galego de pista cuberta e os nervios que adoitan experimentarse nestes eventos deportivos, amosaron moita madurez e deixaron claro que o importante é desfrutar da xornada e da experiencia de poder formar parte deste campionato. En canto aos resultados, a primeira delas conseguiu superar unha altura inicial de 0.75m, quedando nos 0.81 condicionada polos nervios, que non lle permitiron chegar á súa mellor marca persoal de 0.90 metros. A segunda, na proba de peso, logrou superar a súa mellor marca da tempada e facer MMP, cun lanzamento de 4.68 metros. Como representante masculino acudiu o benxamín Mario López, que con sete anos e no seu primeiro ano de atletismo conseguiu un posto nas semifinais dos 50m.l. deste campionato galego, moi ilusionado e mantendo a súa marca de 9.19. María Mourelle sería a encargada de representar á categoría sub12 no seu primeiro ano como alevín, rematando a proba de lonxitude coa medalla de bronce e un mellor salto de 3.75m., batindo a súa MMP. Na derradeira categoría, como representante masculino da categoría sub14, tamén no seu primeiro ano como infantil, destacaría Nicolás Núñez, disputando as probas de 60m.v. e altura e converténdose nesta última no campión galego, logo de superar os 1.53 metros que lle darían a merecida medalla de ouro. En canto ás nosas atletas, Antía Pernas e María Quintela participarían nas semifinais dos 60m.l., cuns tempos de 8.58 e 9.11 respectivamente e na que a medalla de bronce sería para Antía na final, conseguindo facer a proba en 8.56. María, de segundo ano, repetiría nos 500m.l., proba que conseguiría rematar parando o tempo en 1:31.55 e facendo a súa mellor marca da tempada. Nas seguintes probas máis longas, foron Carla Díaz e Estela Díaz as encargadas de disputar os 1.000m e 2.000m, resp. A primeira delas conseguiu rematar en 3:33.16, obtendo a 7ª posición; mentres que a segunda obtivo o 4º posto finalizándoa nun tempo de 7:34.08; ambas as dúas mellorando as súas marcas persoais e con boas sensacións durante a proba. Nos saltos, Eva Díaz participaría na lonxitude feminina e no triplo salto, tamén mellorando moitísimo as súas marcas persoais malia quedar ás portas de podio, con dous 4º postos que saben a vitoria, cunha destacada participación saltando 4.20m. na lonxitude e 9.12m. no triplo. Neste último, cun gran salto de 9.47m., preto da súa MMP, alzaríase como campiona galega Antía Pernas, obtendo a medalla de ouro e a súa segunda da xornada.
|
En resumo, unha experiencia moi enriquecedora para todas e todos os atletas que viaxaron esta fin de semana á pista cuberta Expourense, desde as categorías maiores ás máis pequenas da Escola, varias medallas e moitas mellores marcas persoais, as verdadeiras vitorias destes/as grandes atletas que día a día traballan para conseguir mellorar.
GRANDE NORABOA!!
Enlace con la noticia original: RESULTADOS dos Campionatos de Galicia de Pista Cuberta (24 e 25 febreiro)
