Publicado por: F.G. Ciclismo
O galego Iñigo Rodríguez ( Aldro Team) estreo o seu palmarés de vitorias no ano do seu debut como sub 23 ao impoñerse no sprint da cuarta e última etapa da Volta a Salamanza. O ciclista vigués foi o vencedor da etapa que finalizou na rúa María Auxiliadora da capital salmantina tras completar 105 quilómetros de percorrido entre Santa Marta e Salamanca.
A última xornada da rolda charra estivo marcada por unha numerosa escapada ao comezo pero que foi perdendo efectivos e na que terminaron sós outros dous galegos: Cristian Mota ( Aldro) xunto a Óscar González (Supermercados Froiz) ata que o pelotón botóuselles encima pouco antes de chegar á meta. Alí, Iñigo Rodríguez ( Aldro) conquistaba a cuarta etapa ao esprint con 2.18.02 por diante do grupo encabezado por Leangel R. Linarez e Eloy Teruel. Desta maneira o vigués Iñigo Rodríguez estreouse como sub23 e deu a Aldro Team a súa cuarta vitoria da tempada.
“Cando collemos a Mota fómonos para adiante Arozamena e eu. Tiña a idea de atacar antes do sprint e como collemos uns metros, apertei ata a chegada e vi que me impoñía”, comentaba o galego, que non entende a reclamación que fixo o equipo do segundo clasificado, o Kuota Paulino. “Había unha rotonda na parte final, que se podía tomar polos dous lados. Eu fíxeno polo máis curto, pero tamén boa parte do pelotón –composto por uns 50 corredores-, entre eles precisamente o que sería segundo, polo que nin fixen nada antirregulamentario nin saquei ningún beneficio”.
Rodríguez comentaba tras baixar do podio que “custa moito asimilalo, estou que non caibo de contento. O primeiro ano na categoría é moi complicado. Sabes que che tes que adaptar, pero ata que non o ves, non te dás conta do que custa. No meu caso, a primeira parte da campaña foi bastante mala, por non facer as cousas como debía. Pero nestes meses cambiei e xa empezan a saírme as cousas. É unha enorme alegría e á parte de agradecerllo a todo o equipo, que foi o artífice deste éxito, e aos auxiliares e directores, quero dedicarllo ao meu avó, que faleceu fai menos dun ano, aos meus pais e a toda a xente que me está axudando”.
A xeral da rolda charra mantívose nas mans de Raúl García de Mateos, xa líder desde a etapa reina do día previo cun tempo total de 09:23:53, seguido de Eloy Teruel (Mutua Levante- Bioracer) a só 21 segundos, mentres que Alejandro Roupeiro (Polartec-Fundación Contador) completou o podio a 34 segundos.
Por último, o resto de clasificacións menores da xeral foron nesta Volta a Salamanca para Antonio Angulo (Rías Baixas) a da montaña, a de métalas volantes foi Francisco García Rus ( GSport- Wolfbike), que levou tamén a combinada, a da regularidade para Eloy Teruel (Mutua Levante- Bioracer) e a xeral da categoría sub-21 conquistouna Alejandro Roupeiro (Polartec-Fundación Contador). O mellor equipo nesta 47 rolda charra foi o Aldro Team cun tempo de 28:13:50.
Texto ©FGC/Aldro Team
Foto ©El Pelotón
Enlace con la noticia original: O galego Iñigo Rodríguez (Aldro) estrea o seu palmarés na Volta a Salamanca