Publicado por: F.G. Ciclismo
Mais de 250 ciclistas presentáronse en Sabucedo para participar na penúltima proba da Transgalaica2018 na coñecida como "Rapa das Bestas" baixo a organización da P. C. Bikestrada. Debido á choiva caída nas últimas semanas o circuíto atopábase moi pesado e esvaradío o que fixo que o número de abandonos fose considerable.
Na categoría masculina segue en boa xeira Esteban Sánchez ( Extol- La Gramola Team) que repetiu a vitoria da anterior proba. Gran rival tivo en Alejandro Trasbach (Racing Cycling) do que non logrou desprenderse ata última hora e que será previsiblemente o seu mais duro competidor pola xeral final que se decidirá a próxima semana en Ames. A Sánchez bástalle cun cuarto posto na última proba para levar a súa primeira Transgalaica. Terceiro clasificado foi un Alejandro Paleo (P. C.Gráficas Lareira) que cada día vai a máis nesta nova disciplina para el.
Entre as mozas recobrou a senda da vitoria a vixente gañadora da Transgalaica, Isabel Picoaga (C. C.7 Voltas) que se impuxo ao dúo do Extol – La Gramola Team formado por Ana González e Lara Lois. Só 25 puntos separan agora a Isabel de Lara polo que a que quede diante en Ames levará a súa segunda Transgalaica.
Na loita dos equipos triunfo de Extol-La Gramola Team por diante dos mozos do Master Galaico e Monteneme.
Fonte e foto: Transgalaica
Enlace con la noticia original: Esteban Sánchez e Isabel Picoaga, vencedores na Transgalaica de Sabucedo