A choiva apropiouse da Xaxanbike 2018 en Marin

Deslucido se pero non por iso con menos intensidade disputouse no monte de Xaxán de Marín unha nova xornada do calendario de competición de btt XCO, a Xaxanbike 2018 que organiza o club ciclista Marín. Choiva, barro e frio en pleno xuño para converter a modalidade montañeira nunha sorte de ciclocrós de verán.

A actividade ciclista iniciouse cunha matinal dedicada ao mini btt e xa pola tarde e sobre o mesmo escenario a quenda para os maiores na que foi penúltima proba da Copa Galicia. Longo e esixente circuíto o preparado polo Marín que se foi complicando a medida que se sucedían as voltas. Baixo a choiva inclemente as circunstancias do trazado motivaron numerosas avarías e con elas as retiradas dun bo número de participantes.

Aínda que na nómina de resultados non se produciron grandes sorpresas, nalgunhas categorías como a cadete, a ausencia do lesionado Xoel Montes deixa agora moi aberta a loita polo triunfo na Copa.

Agradable sorpresa foi contar con Iván Feijoo (Maceda) na carreira sub23. O allaricense foi terceiro absoluto en Marín cando apenas competiu desde que finalizou a tempada invernal. Sorpresa pero menor foi a vitoria da nova cadete do Farto, Laura Capa que no seu primeiro ano de categoría é capaz de relacionarse e gañar a rivais da talla de Noela Saa (Maceda). Tamén a grovense Lara Lois (Extol) mostrouse intratable nunha categoría absoluta de moitos kilates na que se impuxo á sub23 local Irene Trabazo (Marín) e á campioa Lucía Vázquez (Prorebordosa).

A última cita da Copa terá lugar coa celebración do Trofeo Concello de Maceda o próximo 16 de xuño.

Foto ©Yaiza FP